VEIÐIFÉLAG EYSTRI RANGÁR

Veiðifélag Eystri Rangár

Upplýsingar

Eystri Rangá sameinast Þverá um 5 km. austan við ármót Ytri Rangár og Þverár. Hún er allmikið vatnsfall, (30 - 40 rúmm./sek.) um það bil 60 km. löng, lindá með sterk dragáreinkenni. Um 18 km. ofan ármóta fellur Fiská til hennar frá vinstri og Stokkalækur frá hægri, nokkru neðar. Eystri Rangá er fiskgeng um það bil 22 km. upp að Tungufossi hjá Árgilsstöðum. Meðalveiði síðustu tíu ára er 4707 laxar sem er hæsta meðalveiði laxveiðiár á Íslandi.


Reglur

Í ánni eru leyfðar 18 stangir á 9 svæðum , svæði 1-9 og eru 2 stangir á hverju svæði. Um hverja stöng mega vera 2 veiðimenn og skulu þeir þá vera saman á veiðistað. Ef veiðimenn eru staðnir að því að nota fleiri stangir en leyfilegt er, mega þeir búast við því að vera vísað úr ánni þann daginn. Leyfilegt agn er fluga, maðkur og spúnn. Í hléinu skipta menn um svæði þannig að þeir veiða á svæðinu fyrir neðan það svæði sem þeir veiddu á um morguninn.

Allan stórlax í klakkistur!

Nú er skylda að setja allan lífvænlegan stórlax í klakkistur. Veiðifélag Eystri Rangár biður veiðimenn vinsamlega að setja allar hrygnur yfir 4,0 kg eða 75 cm að lengd í klakkistur. Einnig er óskað eftir hængum yfir 6,0 kg eða 85 cm að lengd. Fyrir hvern lax gefur veiðifélagið reyktan lax sem vegur helming af heildarþyngd veidda laxsins. Þetta fyrirkomulag sparar veiðimönnum um 4000 kr. í reykingu.

Gott er að þreyta laxinn vel til að minnka átök við löndun. Nauðsynlegt er að nota hnútalausan háf sem fæst lánaður í veiðihúsinu og alls ekki stranda laxi í möl. Mikið hreisturslos getur valdið dauða fisksins.

Til að flytja fisk lengri vegalengdir er laxinn geymdur í laxaslöngu, hálffullri af vatni. Þótt laxinum blæði er sjálfsagt að koma honum í klakkistu og gefa honum tíma þar til blæðingin stöðvast. Ef öngull er fastur í laxinum er einfadlega klippt á girnið.

Taka stórlaxa í klak er grundvöllur þess að hægt sé að auka hlutfall stórlaxaveiði í Eystri Rangá. Það skilar sér í hærri meðalþyngd, betri júlíveiði og auknum seiðasleppingum. Þátttaka veiðimanna er nauðsynleg svo að þau markmið náist.

Veiðitími

Frá 1. júlí til 10. ágúst verður veitt frá kl. 07-13 og kl. 16-22.
Frá 11. ágúst til 10. september verður veitt frá kl. 07-13 og kl. 15-21.
Frá 11. september verður veitt frá kl. 07-13 og kl. 14 -20.

Til sérstakrar athugunar fyrir veiðimenn

Skráið afla áður en haldið er heim.
Akið ekki utan vega og lokið hliðum.
Veiðifélagið ber ekki ábyrgð v/tjóns sem búsmali veldur á ökutækjum.
Meðferð skotvopna er bönnuð við ána og einnig er óheimilt að tjalda við ána án leyfis landeigenda.

Skráning afla

Öll skráning á afla er í veiðiþjónustuhúsi Veiðifélagsins sem staðsett er við Veiðihúsin við Eystri Rangá á svæði 4. Ekið er að veiðihúsunum frá þjóðvegi 1 um km fyrir austan Djúpadal. Þar er alltaf heitt á könnunni og aðstaða til að ganga frá fiski og skrá í veiðibók. Einnig er þar kælir undir afla og allar upplýsingar um veiði. Þar geta veiðimenn fengið laxaplast áður en veiðar hefjast undir afla og eru þeir beðnir um að ganga frá hverjum laxi sér í poka til hægðarauka í vigtun og skráningu einnig er mjög gott að hafa plast til að geta flutt stórar hrygnur í lifandi í klakkistur.